Cap de gramatica de l’occitan actualament disponibla presenta pas d’analisi detalhada dels emplecs e de las valors del futur prerifrastic de tipe ANAR + Infinitiu. Es sovent descrich coma un « futur proche (comme en français) » (Sauzet pp. 34-35), un « futur imediat » (Alibert, p. 322), « un futur immédiat avec le sens de “être sur le point de” » (Vernet, p. 184). Sauzet sembla postular una equivaléncia entre futur sintetic e perifrastic « Va arrivar dins cinc minutas (= arribarà) / Va plòure lèu (= plourà) » (p. 35). Ça que la, Romieu e Bianchi (p. 245 e 418), al contrari, ne retenan mai que mai una valor aspectuala : considèran anar coma un mièg auxiliari d’aspècte que presenta lo procès « abans lo començament de sa realizacion », postulan pas d’equivaléncia amb lo futur sintetic. Pel francés, la literatura reten tres valors principala del futur perifrastic : 1)Una valor temporala de « futur proche » o « futur immédiat » o « futur imminent » : « Il va bientôt partir » « Ce soir je vais regarder le match à la télé » 2)Una valor modala que marca una nuància d’« allure extraordinaire » (Scrott 2001), valent a dire que la forma perifrastica marca «un caractère dérangeant par rapport à l’ordre attendu des choses » (Damourette & Pichon, § 1652) « – Je parie que vous allez jusqu’aux Accates ? – Plus loin. – Alors aux Camoins ? – Plus loin. – Bouzigue ouvrit des yeux énormes : “ Vous n’allez pas me dire que vous allez jusqu’à La Treille ?” » (Pagnol, Le Château de ma mère, citat per Schrott 2001) 3)Una valor aspectuala que se rapòrta, segon los autors : •a un procès futur qu’es la consequéncia d’una situacion actuala : « Le marquis cherchait la poigne invisible pour en desserrer l’étreinte. Il râlait. « Je vais mourir » (citat per Schroot, 2001). Dins aquela frasa lo futur simple es incompatible amb lo contexte : se poiriá pas dire « Je mourrai », – lo personatge es victima d’una crisi cardiaca – donat que lo futur sintetic presentariá lo procès coma un eveniment virtual sens cap de ligam amb la situacion presenta. •A un procès futur que ne vesèm los indicis dins la situacion actuala : « Jean va abattre le vieux chêne» (Verkuyl et. al 2004) Aquela frasa se referís a una situacion qu’es la fasa preparatòria de l’eveniment localisat dins lo futur, valor aspectuala dicha ‘prospectiva’ (Vet 2001, 2008). Estudiarem las valors e los emplecs del futur perifrastic en occitan a partir d’un còrpus tirat de la basa BaTelÒc, en adoptant una demarcha contrastiva de comparason amb lo francés, per tal de determinar – entre autras causas – s’en occitan lo futur perifrastic pòt tanben aver las tres valors descrichas pel francés ; o eventualament d’autras. Assajarem tanben de delimitar los emplecs especifics et los emplecs concurrents del futur perifrastic e del futur sintetic, d’una part, e de las doas formas perifrasticas ANAR + Infinitiu e VOLER + Infinitiu, d’autra part.